Psalms 62
Devitiva maa ihira qara ntuvatora
1Te Kotira veka qihaaqamake vauro.Vivama ti ruaruama timite vaivama vairo.
2Vivaqaima ti antua timiteharo navutaaka kauquqihairo ti vara qaqini kuvantu timite vaivama vairo.
Ori vaantaavuravano vaiinti antua amitaintema kero, viva ti antua timite vaimanta navutaaka kia ti aatara kaarave.
3˻Ti navutaaka,˼ ne tairentae qaqirake kia ti harireka anivarave?
Hohaa vaiqatavira venta kaantemake, ne tiriara viva ekaara taiqa vuarire ti, ti hampata raqi variavo.
4Ne te nora autu vataunara vira vatainiqama kareka auti variavo.
Ne quaheha una uva tivaqi vi variarave.
Ne nenta noqihai vaiintiara koqema kera variane tivakeha, nenta aatoqihai vi vaiintiva qoraiqama vuataarave ti variarave, turo.
5Te Kotira veka qihaaqamake vauro. Te vira veka vaiha virara noraiqaake iriqi virerave.
6Vivaqaima ti antua timiteharo navutaaka kauquqihairo ti vara qaqini kuvantu timite vaivama vairo.
Ori vaantaavuravano vaiinti antua amitaintema kero, viva ti antua timite vaimanta navutaaka kia ti aatara kaarave.
7Kotiva vivaqai ti ruaruama timiteharo, nora autuvata ti timirave.
Viva kempukaiqama kero ti antua timite vaimantama vauro. Vaiintivano ori onavuqi mantaaqaviro ho vaintemake, te viva inaini oru vaunara.
8Ti vaiinti nahentivauvo, ne ekaa enta Kotiraqaa muntuvi vaiha virara noraiqaake iriqi vuate.
Kotiva tinavu antua timite vaiva vairara ti, maaravano niqi vaina entara ne vira tiva amivaro viva ni kahaqiarire.
9Tenavu vaiinti nahenti vairera, noqihairo aiho uritaraira voqaarama vauro.
Nora vaiintive, vehi vaiintive, tenavu ekaa qumina haika voqaarama vauro.
Vovano tinavu maarasikeriqaa hirikero tavairera, tinavu maaravano kiama varianaro.
10Vaiinti ruqutiha vira airaira vare varia okarara qora okarave tivakera kia vira autuane. Vo haika varareva ihara kia muara autukera vi haikara varaane.
Are airi airaira vatairera, kia vi haikaraqaa muntuvi variane.
11Kotiva kia vohaa tataa maa uvara tiraitiro, viva qaiqaavata mintima tiro: Te kempukavano vauraro 12ti muntukavano vaiinti nahentiara vaimantama vauro, ti vaira.
Noravano Kotiva ekaa vaiinti nahenti kaiqara iriharo nái koqaa nimi vaivama vaivo, turo.
Copyright information for
TBG